រាជធានីភ្នំពេញ ៖ គណៈប្រតិភូជាន់ខ្ពស់កម្ពុជា ដឹកនាំដោយលោក យឹម ឆៃលី ឧបនាយករដ្ឋមន្ត្រីនៃព្រះរាជាណាចក្រកម្ពុជា អមដំណើរដោយលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃព្រហស្បតិ៍ ៤កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២១ ខែធ្នូ ឆ្នាំ២០១៧ម្សិលមិញ បានចូលជួបសម្តែងការគួរសមនិងពិភាក្សាការងារជាមួយលោកជំទាវ Gao Yan អនុរដ្ឋមន្ត្រីក្រសួងពាណិជ្ជកម្មនៃសាធារណរដ្ឋប្រជាមានិតចិន នៅទីស្ដីការក្រសួងនាទីក្រុងប៉េកាំង ។
យោងតាមរបាយការណ៍របស់មន្ត្រីអមដំណើរបានអះអាងថា ភាគីទាំងពីរបានវាយតម្លៃខ្ពស់ចំពោះ លទ្ធផលនៃកិច្ចសហប្រតិបត្តិការនៃប្រទេសទាំងពីរកន្លងមក ហើយភាគីចិនបានទទួលយកសំណូមពររបស់ភាគីកម្ពុជាយកទៅពិនិត្យនិងជួយជម្រុញក្នុងការអនុវត្តនាពេលខាងមុខ ក្នុងនោះរួមមាន៖
ទី១ សន្យាជួយគាំទ្រគម្រោងនានា ដែលក្រសួងកសិកម្ម រុក្ខាប្រមាញ់ និងនេសាទកម្ពុជាបានស្នើសុំហិរញ្ញប្បទានសម្បទានពីរដ្ឋាភិបាលចិន ដើម្បីអភិវឌ្ឍវិស័យកសិកម្មកម្ពុជា។ ទន្ទឹមនឹងនេះ ភាគីចិននិងជួយរៀបចំផែនការមេស្តីពីការធ្វើទំនើបកម្ម ពិពិធភាវូបនីយកម្ម និងពាណិជ្ជូបនីយកម្មកសិកម្មដើម្បីបង្កើនជីវភាពប្រជាជនឆ្លើយតបទៅនឹងកំណើនសេដ្ឋកិច្ចកម្ពុជា។
ទី២ ក្រសួងពាណិជ្ជកម្មចិនឯកភាពជម្រុញអង្គភាពរដ្ឋបាល ចត្តាឡីស័កត្រួតពិនិត្យនិងគ្រប់គ្រងគុណភាព (AQSIQ) ប្រទេសចិន ធ្វើការសម្រួល និងពន្លឿនពិធីសារបន្ថែមមុខទំនិញផលិតផលកសិកម្មឲ្យច្រើនជាងបច្ចុប្បន្ន។
ទី៣ ភាគីចិនព្រមទទួលយកទៅពិនិត្យក្នុងការរៀបចំអនុវត្តពិធីសារនៃអនុស្សារណៈយោគយល់គ្នាស្តីអំពីការនាំចេញទំនិញកសិផលពីកម្ពុជាទៅកាន់ប្រទេសចិនដោយអនុគ្រោះពន្ធចំនួន ៨០៣០មុខទំនិញដែលបានចុះហត្ថលេខាកាលពីខែមិនា ឆ្នាំ២០១៦។
ទី៤ ភាគីទាំងពីរបានឯកភាពលើការជម្រុញការហោះហើរត្រង់ពីចិនទៅកម្ពុជាឲ្យបានច្រើន ដើម្បីជម្រុញកំណើនទេសចរណ៍ចិនទៅកាន់កម្ពុជា។ និងទី៥ នឹងជួយគាំទ្រដល់ក្រុមហ៊ុន ហ័រថុងឈីនតាវ អភិវឌ្ឍន៍តំបន់សេដ្ឋកិច្ចពិសេសនៅខេត្តព្រះសីហនុ ស្របតាមគោលនយោបាយផ្លូវមួយខ្សែក្រវ៉ាត់មួយ និងធ្វើឲ្យគម្រោងនេះក្លាយជាគម្រោងគំរូនៅក្នុងតំបន់អាស៊ីអគ្នេយ៍។
ឆ្លើយតបទៅនឹងការសន្យារបស់ភាគីចិនក្នុងការពង្រឹងកិច្ចសហប្រតិបត្តិការក្នុងវិស័យពាណិជ្ជកម្ម និងទេសចរណ៍ លោក យឹម ឆៃលី ឧបនាយករដ្ឋមន្ត្រី បានសន្យាថានឹងរៀបចំក្រុមការងារក្នុងវិស័យទាំងពីរនេះនៅពេលខាងមុខនេះដើម្បីពិភាក្សាលម្អិតជាមួយភាគីចិនក្នុងការឈានទៅសម្រេចនូវការអនុវត្តគម្រោងការងារនេះទទួលបានជោគជ័យ។ ដោយឡែកវិស័យកសិកម្ម ភាគីទាំងពីរបានឯកភាពគ្នានឹងបន្តការពិភាក្សានៃកិច្ចសហប្រតិបត្តិការលើវិស័យនេះតាមរយៈយន្តការការក្រុមការងារដែលមានស្រាប់ ៕
