ភ្នំពេញ៖ លោកមានចាន់យ៉ាដា អភិបាលរងរាជធានីភ្នំពេញ បានមានប្រសាសន៍លើកឡើងថា អ្នកជាប់ទោសតែងតែឡើងថ្នាក់បទល្មើសពេលចេញពីគុកវិញ ពោលគឺជាប់ទោសពីបទលួច តែពេលចេញពីគុកវិញ មកធ្វើសកម្មភាពប្លន់ ដែលជាចំណុចមួយដែលមន្ត្រីអនុរក្សត្រូវយកចិត្តទុកដាក់និងកែប្រែអោយបានល្អ។
ការលើកឡើងរបស់លោកមានចាន់យ៉ាដា បែបនេះ ក្នុងកិច្ចប្រជុំវគ្គបណ្តុះបណ្តាលវិជ្ជាជីវៈនិងមុខរបរពិតប្រាកដដល់ទណ្ឌិត ដែលបានធ្វើឡើងកាលពីព្រឹកថ្ងៃទី២១ ធ្នូ ២០១៧ នៅសាលារាជធានីភ្នំពេញ ដោយមានវត្តមានលោកឧត្តមអគ្គានុរក្សថ្នាក់លេខ១ ម៉ៅ សំបុណ្យ អគ្គនាយករង នៃអគ្គនាយកដ្ឋានពន្ធនាគារ ក្រសួងមហាផ្ទៃ តំណាងស្នងការនគរបាល កងរាជអាវុធហត្ថរាជធានីភ្នំពេញ និងមន្ទីរនៅក្រោមឧិវាទរដ្ឋបាលរាជធានីភ្នំពេញផងដែរ។
លោកមានចាន់យ៉ាដា បានលើកឡើងទៀតថា កិច្ចប្រជុំនេះធ្វើឡើងដើម្បីបញ្ជ្រាបការយល់ដឹងដល់មន្ទីរពាក់ព័ន្ឋរដ្ឋបាលរាជធានីភ្នំពេញ លើការបណ្តុះបណ្តាលវិជ្ជាជីវៈនិងមុខរបរពិតប្រាកដដល់ជនជាប់ឃុំនៅពេលពួកគេមានសេរីភាពនៅក្នុងសង្គម។
ការបង្រៀនដល់ទណ្ឌិតអោយយល់ដឹងពីពលកម្មនិងជៀសវាងការប្រព្រឹត្តបទល្មើសទៅថ្ងៃក្រោយ ពោលគឺក្រោយពីពួកគេធ្វើសមារណកម្មវិលចូលទៅក្នុងសហគមន៍មូលដ្ឋានវិញ។ ការស្នើសុំអោយរដ្ឋបាលរាជធានីនិងមន្ទីរជំនាញពាក់ព័ន្ធចូលរួមគាំទ្រដល់ការបណ្តុះបណ្តាលមុខវិជ្ជាជីវៈទណ្ឌិតស្ថិតនៅជាប់ឃុំ។
លោកបន្តថា ដើម្បីអោយទណ្ឌិតដែលបានចេញពីគុកវិញបានកែប្រែនឹងយកវិជ្ជាជីវៈដែលបានហាត់រៀនពេលជាប់ទោសមកប្រកបមុខរបរនៅក្នុងសង្គមដោយសុច្ចរិត មិនបន្តធ្វើសកម្មភាពល្មើសច្បាប់បន្តទៀតនោះ មន្ត្រីអនុរក្សត្រូវចេះអប់រំចិត្តសាស្ត្រដល់ទណ្ឌិតអោយបានល្អ ហើយពេលចេញមកវិញ អាជ្ញាធរមូលដ្ឋានត្រូវតាមដានមើលទណ្ឌិតនោះជាប់ជាប្រចាំ ថាតើពួកគេបានកែប្រែខ្លូនឬទេ។
លោកមាន ចាន់យ៉ាដាអភិបាលរងរាជធានីបានចាត់ទុកការបើកវគ្គនេះគឺការផ្តល់តំលៃដល់អ្នកជាប់ទោសក្រោយពីបានអប់រំកែប្រែខ្លួននិងពួកគេបានធ្វើសមារណកម្មវិលចូលទៅក្នុងសហគមន៍ព្រមទាំងមានមូលដ្ឋានទៅប្រកបមុខរបរសុច្ចរិតនៅក្នុងសង្គមវិញនោះ។
លោកម៉ៅ សំបុណ្យ ឧត្តមអគ្គានុរក្ស អគ្គនាយករង នៃអគ្គនាយកដ្ឋានពន្ធនាគារ ក្រសួងមហាផ្ទៃបានមានប្រសាសន៍ថា អ្នកទោសមួយចំនួនបានកែប្រែលខ្លួនបានយ៉ាងល្អ ដូច្នេះទេលោកចង់អោយក្រុមហ៊ុនដែលបានដេញថ្លៃពីស្ថាប័នរដ្ឋអាចបញ្ជូនការរងារមួយទៅដល់ទណ្ឌិតដែលបានបណ្តុះបណ្ដាលក្នុងពន្ឋធនាគារមានការងារធ្វើនិងទោះបីមានតំលៃទាបជាងនិងស្តង់ដារដូចអ្វីដែលក្រុមហ៊ុនធ្វើក៏ដោយ ដើម្បីអោយពួកគេទទួលបានកំរ៉ៃខ្លះពីការងារនេះ៕
