ខេត្តបន្ទាយមានជ័យ ៖ កម្លាំងមូលដ្ឋានកងរាជអាវុធហត្ថក្រុង ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត ក្រោមការបញ្ជាផ្ទាល់របស់លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថ
ខេត្ត បានចុះប្រតិបត្តិការបង្ក្រាបករណី ឃាតកម្មគិតទុកជាមុន ដោយសម្លាប់ក្មេងស្រីម្នាក់ច្រកចូលការ៉ុងនិងឃាត់ខ្លួនជនសង្ស័យបានចំនួន ០១នាក់ ។
ការចុះប្រតិបត្តិការនេះក្រោយពីទទួលពាក្យបណ្តឹងរបស់ឈ្មោះ ស្រៀង កំសត់ (ជាឪពុករបស់កុមារីរងគ្រោះឈ្មោះ ស្រៀង ឈុនអ៊ី) បច្ចុប្បន្នរស់នៅភូមិសីលាខ្មែរ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ស្តីពីករណីបាត់កូនស្រី ។
ជនសង្ស័យឈ្មោះ សុខ ខឿនសយធី អាយុ១៦ឆ្នាំ ជាអ្នកភូមិសិលាខ្មែរ ឃុំអូរបីជាន់ ស្រុកអូរជ្រៅ ដែលមានផ្ទះឆ្ងាយពីផ្ទះជនរងគ្រោះប្រហែល៤ម៉ែត្រ ក្នុងភូមិតែមួយ។ ចំណែកក្មេងស្រីរងគ្រោះឈ្មោះ ឈុន អ៊ី ហៅលីហ្សា អាយុ១២ឆ្នាំ ជាសិស្សសាលាឯកជនពន្លកខ្មែរ មានទីលំនៅភូមិសិលាខ្មែរ ឃុំអូរបីជាន់ ស្រុកអូរជ្រៅ ហើយក្មេងស្រីរងគ្រោះជាកូនទី៣ ក្នុងចំណោម៤នាក់ មានឱពុកឈ្មោះ ស្រៀង កំសត់ អាយុ៤០ឆ្នាំ និងម្តាយឈ្មោះឡី ស្រី អាយុ៣៥ឆ្នាំ។ ហើយជនសង្ស័យ និងក្មេងស្រីរងគ្រោះស្គាល់គ្នាតាំងពីតូចៗម្ល៉េះ ។
គួររំលឹកថា ហេតុការណ៍នេះកាលពីវេលាម៉ោងជាង៤រសៀល ថ្ងៃទី៣០ មីនា ក្មេងស្រីរងគ្រោះជាសិស្សសាលាឯកជនពន្លកខ្មែរម្នាក់រស់នៅភូមិក្បាលស្ពាន ក្រុងប៉ោយប៉ែត ត្រូវជនដៃដល់រឹក.កសម្លាប់ញាត់ការ៉ុងនៅក្នុងបន្ទប់ជួលស្លាប់យ៉ាងអាណោចអាធ័ម ។
ក្រោយមកត្រូវគេឆែកឃើញតាមកាមេរ៉ាសុវត្ថិភាព និងស្រាវជ្រាវយ៉ាងយកចិត្តទុកដាក់តាមបទបញ្ជាពីលោកឧត្តមសេនីយ៍ត្រី បោន ប៊ិន ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការអាវុធហត្ថក្រុងប៉ោយប៉ែត ចុះរកឃើញជនរងគ្រោះ និងចាប់ជនសង្ស័យភ្លាមៗនៅបន្ទប់ជួល លេខA.05ក្បែរខារ៉ាអូខេយីហោK1 ក្នុងភូមិក្បាលស្ពាន សង្កាត់ប៉ោយប៉ែតនៅម៉ោង៧យប់ថ្ងៃដដែល ។
លោកវរសេនីយ៍ឯក ម៉ែន ភិរម្យ បានបញ្ជាក់ថា៖ តាមចម្លើយសារភាពរបស់ជនសង្ស័យ និងតាមការធ្វើកោសល្យវិច្ច័យពីគ្រូពេទ្យ និងយោងតាមរបាយការណ៍ស្តាប់ចម្លើយរបស់ជនសង្ស័យ អាចបញ្ជាក់ពីតម្រុយនៃពិរុទ្ធយ៉ាងជាក់លាក់ ដូចនេះជនសង្ស័យខាងលើ អាចត្រូវចោទពីបទ (ឃាតកម្មគិតទុកជាមុន) ។ កម្លាំងជំនាញបានរៀបចំសំណុំរឿងបញ្ជូនជនសង្ស័យ និងវត្ថុតាង ទៅតុលាការ ដើម្បីចាត់ការទៅតាមនីតិវិធី ៕
