ក្រចេះ៖ នាព្រឹកថ្ងៃទី០១ ខែមេសា ឆ្នាំ២០១៨នេះ ក្រុមហ៊ុន GreenLeader បានចាប់ផ្ដើមបញ្ចុះ បឋមសិលាបើកការរដ្ឋានសាងសង់រោងចក្រកែច្នៃផលិតម្ស៉ៅដំឡូងមីទី១ ដែលមានសមត្ថ ភាព កែច្នៃដំឡូងមី ជាម្សៅប្រមាណ ១០ម៉ឺនតោនក្នុងមួយឆ្នាំ នៅលើទឹកដីស្រុកស្នួល ខេត្តក្រចេះ ក្រោមអធិបតីភាពឯកឧត្តម យឹម ឆៃលី ឧបនាយរដ្ឋមន្ត្រី និងជាប្រធានក្រុមប្រឹក្សា ស្ដារអភិវឌ្ឍន៍វិស័យកសិកម្ម និងជនបទ ។
លោក Michael Tse នាយកប្រតិបត្តិនៃក្រុមហ៊ុន GreenLeader ដែលជាក្រុមហ៊ុនមួយ បានបោះទុននិវិយោគ ក្នុងកម្រិតធំលើការកែច្នៃ ផលិតផលដំឡូងមី បានលើកឡើងថា ក្រុមហ៊ុនបានចំណាយអស់រយៈពេល២ឆ្នាំ ដើម្បីធ្វើការស្រាវជ្រាវ និងវិភាគយ៉ាងលំអិតទៅលើ ទីផ្សាវិស័យកសិកម្មដាំដុះ និងកែច្នៃផលិតផលដំឡូងមីរបស់ប្រទេសកម្ពុជា ។ ដោយមានការ គាំទ្រពីសំណាក់រាជរដ្ឋាភិបាលកម្ពុជា រោងចក្រទីមួយដែលមានសមត្ថភាពផលិតម្ស៉ៅដំឡូងមី ១០ម៉ឺនតោនក្នុងមួយឆ្នាំ និងម្ស៉ៅដំឡូងមីកែប្រែ ៣ម៉ឺនតោនក្នុងមួយឆ្នាំ ។
លោក Michael Tse បានបញ្ជាក់ថា ផែនការពាណិជ្ជកម្មរបស់ក្រុមហ៊ុន គឺបង្កើតរោង ចក្រដូចខាងលើនេះឲ្យបាន ចំនួន២០រោងចក្រ នៅតាមតំបន់និងបណ្ដារខេត្តផ្សេងៗគ្នា នៃប្រទេស។ ក្រុមហ៊ុន GreenLeader មានផែនការ ធ្វើការផ្លាស់ប្ដូរវិស័យកសិកម្មដំឡូងមី កម្ពុជាឲ្យទៅជាវិស័យផលិតកម្មកែច្នៃដំឡូងមីពិតប្រាកដ។
លោក Tse បានបញ្ជាក់ថា ដើម្បីអាចទទួលបានផលកែច្នៃ ក្នុងទ្រង់ទ្រាយដូចខាងលើ រោងចក្រចាំបាច់ត្រូវការដំឡូងមីជាវត្ថុធាតុដើមយ៉ាងតិច ៥០ម៉ឺនតោន ក្នុងមួយឆ្នាំ ហើយដើម្បី ទ្រទ្រង់កម្រិតផលិតកម្មនេះបាន ក្រុមហ៊ុននឹងប្រើប្រាស់យន្តការ កិច្ចព្រមព្រៀងកសិកម្ម ជាមួយនឹងកសិករ ដោយផ្ដល់ជូននូវឥណទានសំរាប់ការដាំដុះ បច្ចេកទេសដាំដុះ គ្រឿងចក្រកសិកម្ម ធ្វើឲ្យកសិករគ្មានក្តីបារម្ភណ៍ ទៅលើការលក់ផលិតផលមិនចេញ និងជួយទ្រទ្រងចំពោះចំណូលជីវភាព របស់ប្រជាកសិករ យ៉ាងពិតប្រាកដ។
លោកបានបន្ថែមថា ក្រុមហ៊ុនក៏មានគម្រោងបង្កើត រោងចក្រចំនួន ៥ ក្នុងរយៈពេល២ឆ្នាំ ដោយរោងចក្រទីពីរ អាចនឹងសាងសង់ នៅប៉ែកខាងខេត្តបាត់ដំបង ប៉ៃលិន និងបន្ទាយមានជ័យ ។
ជាកិច្ចឆ្លើយតបឯកឧត្តម យឹម ឆៃលី ឧបនាយរដ្ឋមន្ត្រី បានថ្លែងអំណរគុណដល់ ក្រុមហ៊ុន GreenLeader ដែលបានមកបោះទុនកម្រិតធំនេះនៅកម្ពុជា ជាពិសេសគឺវិនិយោគ លើវិស័យកសិកម្ម ដែលជាវិស័យមួយដ៏សំខាន់របស់កម្ពុជា។ ជាមួយនឹងផលិតផលដំឡូងមី ឯកឧត្តមបានមានប្រសាសន៍ថា ដំឡូងមីគឺជាផលិតផលកសិកម្មធំទីពីរ របស់កម្ពុជា បន្ទាប់ពីស្រូវ ហើយក៏ជាផលិតផលមួយ ដែលមានសក្ដានុពលខ្ពស់ សម្រាប់កែច្នៃ និងនាំចេញដោយដំឡូងមី អាចកែច្នៃទៅជាមុខទំនិញ ជាច្រើនដូចជា ម្សៅមី ប្រេងឥន្ធនៈអេតាណុល គ្រាប់ថ្នាំពេទ្យ គ្រឿងឧបភោគ បរិភោគដទៃទៀត។
ឯកឧត្តម សង្ឃឹមថា ការវិនិយោគនេះ នឹងផ្ដល់ផលប្រយោជន៍ជាច្រើន ដល់កសិករ កម្ពុជា ជាពិសេសបង្កើនចំណូល របស់ពួកគាត់ កាត់បន្ថយចំណាកស្រុក និងរួមចំណែក ដល់កំណើនសេដ្ឋកិច្ចជាតិ។ ឯកឧត្តមឧប យឹម ឆៃលី ជម្រាបជូនថា ក្រុមហ៊ុន GreenLeader អាចពិចារណាចាប់ជាដៃគូជាមួយក្រុមហ៊ុនក្នុងស្រុក ដើម្បីជាការផ្ទេរចំណេះដឹង និងបច្ចេក វិទ្យា ហើយជម្រាបដែរថា ក្រសួងពាណិជ្ជកម្ម នឹងត្រៀមខ្លួនជានិច្ច ដើម្បីជួយសម្រួលដល់ ដំណើរការធុរកិច្ចរបស់ក្រុមហ៊ុន៕