ភ្នំពេញ ៖ ទីបំផុតអតីតអភិបាលខេត្តតាកែវ លោក ឡាយ វណ្ណៈ បានសារភាពថា គាត់ជាប្រុសស្នេហ៍អ្នកស្រី ចេវ សុវឌ្ឍនា តែបានបដិសេធរឿងជាប់ពាក់ពន្ធ័ឃាតកម្ម ។ លោក ឡាយ វណ្ណៈ បានបញ្ជាក់តាមហ្វេសប៊ុកនាថ្ងៃទី៣១មីនាថា៖ «ខ្ញុំសូមបញ្ជាក់អះអាងថា រូបខ្ញុំ និងប្អូនស្រី ចេវ សុវឌ្ឍនា មានទំនាក់ទំនងស្នេហា ស្រឡាញ់គ្នាជាមួយគាត់ពិតប្រាកដមែនក្នុងរយៈពេលជាង ១ឆ្នាំកន្លងមកនេះ។ ក្រោយមកដោយភរិយាខ្ញុំបានដឹង ខ្ញុំបានសុំកាត់ផ្តាច់ទំនាក់ទំនងជាមួយគាត់ ដែលធ្វើឲ្យគាត់ខឹងសម្បានឹងខ្ញុំរហូតដល់គាត់គិតខ្លីធ្វើអត្តឃាដខ្លួនឯង។ នេះជារឿងពិត ប៉ុន្តែខ្ញុំសូមបដិសេដទាំងស្រុងនូវរាល់ការចោទប្រកាន់ដែលថារូបខ្ញុំនិងបងប្រុសខ្ញុំ បានសម្លាប់ប្អូនស្រី ចេវ សុវឌ្ឍនា»។
លោកថា បើសិនជាលោក និងបងប្រុសជាអ្នកប្រព្រឹត្ត ម្ល៉េះពេលនេះ អ្នកទាំងពីរ បានគេចខ្លួនទៅក្រៅប្រទេសបាត់ទៅហើយ លោកមិនរត់ទៅណាទេ។ស្អែកនេះ (ថ្ងៃទី១មេសា)ខ្ញុំនៅខេត្តតាកែវ ដើម្បីចូលរួមពិធីផ្ទេរមុខតំណែងប្រធានគណៈកម្មាធិការគណបក្សប្រជាជនខេត្តតាកែវ ពីខ្ញុំឲ្យទៅឯកឧត្តម អ៊ូច ភា ដែលជាអភិបាលថ្មីខេត្តតាកែវយើង ក្រោមអធិបតីភាពឯកឧត្តមឧបនាយករដ្ឋមន្ត្រីប្រចាំការ ប៊ិន ឈិន”។
តែផ្ទុយទៅវិញ ប្រភពខ្លះលួចខ្សឹបថា៖បើយោងតាមចម្លើយសារភាពរបស់ តៃកុងឡាន លោក ឡាយ វណ្ណ: មូលហេតុដែលឈានទៅដល់សម្លាប់ អ្នកនាង ចេវ សុវឌ្ឍនា ដោយសារតែ អ្នកនាងជាស្រីកំណាន់ចិត្តរបស់លោក ឡាយ វណ្ណ: ហើយលោក ឡាយ វណ្ណ: បានជួលផ្ទះកើតហេតុនេះឱ្យនាងស្នាក់នៅម្តងម្កាល ពេលអ្នកនាង ចេវ សុវឌ្ឍនា មិននៅ លោក ឡាយ វណ្ណ: យកស្រីផ្សេងមកដេកនៅលើផ្ទះនេះ ទើបធ្វើឱ្យនាង ចេវ សុវឌ្ឍនា ខឹងសម្បា ក៏មានការឈ្លោះទាស់ទែងគ្នាបង្កឱ្យមានហិង្សា ដោយលោក ឡាយ វណ្ណ: ច្របាច់កសម្លាប់ចោលតែម្តងទៅ។បន្ទាប់មកទើបលោក ឡាយ វណ្ណ: បញ្ជាឱ្យតៃកុងឡាន និងអ្នកបម្រើលើកសពនាងបំឡែង ជាចង់កធ្វើអត្តឃាត?។
ដោយឡែក មន្ត្រីនគរបាលចំនួន ៥នាក់រាប់ទាំងបងប្រុសបង្កើតលោក ឡាយ វណ្ណ: គឺលោក ឡាយ ណារិទ្ធជាស្នងការរងផងនោះ ជាប់ពាក់ព័ន្ធដោយសារតែផ្សំគំនិតអំពើទុច្ចរិត បង្វែរសុំណុំរឿងពីឃាតកម្ម ទៅជាអត្តឃាត។លោកឧត្តមសេនីយ៍ ខៀវ សុភ័គអ្នកនាំពាក្យក្រសួងមហាផ្ទៃបានប្រាប់កាសែតថា៖ ៖ “រឿងនេះ មិនមាននរណាពាក់ព័ន្ធទៀតទេ គឺបញ្ចប់ត្រឹមលោក ឡាយ វណ្ណៈ អតីតអភិបាលខេត្តតាកែវ…. យើងមិននឹកស្មានថា គាត់ហ៊ានធ្វើបែបនេះ គាត់ឧស្សាហ៍ទៅទីនោះញឹកញាប់… ជារឿងធម្មតាទេ ពីព្រោះគាត់ជាអភិបាលខេត្ត… រហូតមកទល់ពេលនេះ មិនទាន់ចាប់ខ្លួន តែកម្លាំងយើងឃ្លាំមើលរហូត ពីព្រោះមិនទាន់មានដីកា… ឲ្យតែមានបញ្ជាចាប់ភ្លាម”។
បន្ទាប់ពីបំបែកសំណុំរឿងឃាតកម្មដ៏កក្រើកមួយពេញផ្ទៃប្រទេស កាលពីរសៀលថ្ងៃទី៣១ ខែមីនា ឆ្នាំ២០១៨ នេះសមត្ថកិច្ចនាយកដ្ឋាននគរបាលព្រហ្មទណ្ឌ នៃក្រសួងមហាផ្ទៃ បានបញ្ជូនខ្លួនលោកឡាយ ណារិទ្ធ អតីតស្នងការរងនគរបាលខេត្តតាកែវ និងមនុស្សចំនួន០៤នាក់ទៀត ទៅកាន់សាលាដំបូងរាជធាននីភ្នំពេញ(ផ្ទេរសំណុំរឿងមកភ្នំពេញ) ដើម្បីឲ្យព្រះរាជអាជ្ញាធ្វើការសាកសួរពាក់ព័ន្ធករណីស្លាប់របស់លោកស្រី ចេវ សុវឌ្ឍនា មន្ត្រីបម្រើការងារនៅរដ្ឋសភា ។
ជនសង្ស័យទាំង៥នាក់ ដែលបញ្ជូនទៅតុលាការមានដូចជា ១.ឈ្មោះ ឡាយ ណារិទ្ធ ២.ឈ្មោះ ចាន់ រី ភេទស្រី ៣.ឈ្មោះ ជឹម វុធ (ប្តីរបស់ចាន់ រី) ជាអ្នកបម្រើនៅផ្ទះអ្នកស្រី ចេវ សុវ ឌ្ឍនា។ ៤.ឈ្មោះ មេន សម័យ អ្នកបើកឡានឲ្យលោកឡាយ វណ្ណៈ និង៥.ឈ្មោះ តាក់រតនាជាអ្នកបើកឡានឲ្យលោកឡាយ ណារិទ្ធ។រហូតមកទល់ពេលនេះ លោកសៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ពុំទាន់សម្រេចបែបណាទេ ។រហូតមកទល់ម៉ោង៦កន្លះថ្ងៃដដែល តុលាការបានសម្រេចបញ្ជូនជនសង្ស័យទៅឃុំខ្លូនបណ្ដោះអាសន្ននៅក្រសួងមហាផ្ទៃ ដោយរង់ចាំធ្វើការសាកសួរបន្ថែមទៀត នៅថ្ងៃទី១ ខែមេសា បន្តទៀត ។
សូមជម្រាបថា : អ្នកនាងស្រី ចែវ សុវឌ្ឍនា ជាស្ត្រីមេម៉ាយ មានកូន៣នាក់ ត្រូវបានគេប្រទះឃើញចងកក្នុងបន្ទប់ដេក នៃផ្ទះជួល ដ៏ធំរបស់ខ្លួន ក្នុងភូមិ ផ្សារតាកោរ សង្កាត់រការក្នុង ក្រុងដូនកែវ ខេត្តតាកែវ កាលពីល្ងាច ថ្ងៃទី២៦ ខែមករា ឆ្នាំ២០១៨កន្លងទៅ ដែលករណីនេះក្រោយកើតហេតុភ្លាមៗ ត្រូវបានសមត្ថកិច្ចកាឡៃថាជាការធ្វើអត្តឃាតដោយសារ មានវិបត្តិស្នេហា។ក្នុងរបាយការណ៍នគរបាលក្រុងដូនកែវ បានបញ្ជាក់ថា ស្ត្រីឈ្មោះ ចេវ សុវឌ្ឍនា បានយកខ្សែវាំងននបង្អួចចងកសម្លាប់ខ្លួន នៅកម្ពស់ពីកម្រាលឥដ្ឋ២៤០សង់ទីម៉ែត្រ ពីចុងជើង មកកម្រាលឥដ្ឋ២០សង់ទីម៉ែត្រ។ ករណីនេះ ជាករណីធ្វើអត្តឃាតប្រាកដមែន។ប៉ុន្តែការស្លាប់នេះ ត្រូវបានសាច់ញាតិ និងមហាជនសង្ស័យថា មិនមែនជាករណីអត្តឃាតចងកឡើយ ។
អ្នកស្រី ចេវ សុវឌ្ឍនា អាយុ៣៦ឆ្នាំ មានកូន៣នាក់ក្នុងបន្ទុក មានទីលំនៅបច្ចុប្បន្នស្នាក់នៅបុរីប៉េងហួត ផ្លូវជាតិលេខ២ សមាជិកនៃក្រុមយុវជន ក១៥៧ និងជាអ្នកបម្រើការនៅរដ្ឋសភាផងដែរ។ លោក ឡាយ វណ្ណៈ គឺជាកូនប្រុសរបស់ថៅកែហាងមាស និងពេជ្រ ឈ្មោះ គង់ ហុង នៅផ្សារថ្មី និងជាកូនប្រសារបស់លោក ស៊ូ ភារិន្ទ អតីតចៅហ្វាយខេត្តតាកែវនិងសៀមរាបបច្ចុប្បន្នរដ្ឋលេខាធិការទីស្តីការគណរដ្ឋមន្ត្រី។ ឯលោក ឡាយ ណារិទ្ធ ជាបងប្រុសបង្កើតលោក ឡាយ វណ្ណៈ គឺជាកូនប្រសារបស់ខ្មោចលោក ឯក ក្រិតអតីតស្នងការខេត្តកណ្តាល៕
