កំពង់ធំ ៖ ប្រជាពលរដ្ឋរស់នៅក្នុងស្រុកសណ្ដាន់បានឲ្យដឹងថាប្រជាពលរដ្ឋនៅក្នុងស្រុកសណ្ដាន់ និងស្រុកសន្ទុក បានឲ្យដឹងថា ជារៀងរាល់ថ្ងៃមានឈ្មួញដឹកជញ្ជូនឈើឆ្លងកាត់មូលដ្ឋានពួកគាត់យ៉ាងអនាធិបតេយ្យ ហើយមិនទាន់ឃើញលោក ប៊ុន សុធី មេរដ្ឋបាលព្រៃឈើខេត្តកំពង់ធំ ចាត់វិធានការបង្ក្រាបតាមតួនាទីរបស់ខ្លួននោះទេ ។ ថាមិនបង្ក្រាបឈ្មួញក៏ហីទៅចុះតែផ្ទុយទៅវិញ ពួកមន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធដទៃទៀតបង្ក្រាបតែពលរដ្ឋដឹកឈើ ដឹកអុស បន្តិចបន្តួចប៉ុណ្ណោះ ចំណែកឈ្មួញដឹកឈើតាមរថយន្តសាំយ៉ុង និងរថយន្តកូរ៉េធំៗយកទៅលក់ចែកចាយតាមដេប៉ូក្នុងក្រុងស្ទឹងសែន និងតាមបណ្ដាស្រុកមួយចំនួនមិនដែលឃើញសមត្ថកិច្ចបង្ក្រាបឡើយ ។
ប្រជាពលរដ្ឋនិយាយថា ៖ ចាប់តាំងពីលោក ប៊ុន សុធី មកកាន់តំណែងជានាយខណ្ឌរដ្ឋបាលព្រៃឈើខេត្តកំពង់ធំ ជំនួសលោក តឹប ញាតា មកគឺបទល្មើសដឹកជញ្ជូនឈើខុសច្បាប់នៅតែកើតឡើងយ៉ាងពេញបន្ទុកដដែលវាដូចជាគ្រាន់តែដូរវេនគ្នារកស៊ីជាមួយបទល្មើសតែប៉ុណ្ណោះ។
ប្រជាពលរដ្ឋនៅក្នុងភូមិចុងដូង ឃុំចុងដូង ស្រុកបារាយណ៍ ខេត្តកំពង់ធំ បានឲ្យដឹងថា បច្ចុប្បន្នសកម្មភាពដឹកជញ្ជូនឈើខុសច្បាប់ចេញពីដេប៉ូរបស់ឈ្មួញឈ្មោះ ចែម៉ៅ ក្នុងភូមិចុងដូង នៅតែកើតឡើងយ៉ាងពេញបន្ទុកដដែលដែលធ្វើឲ្យគេគិតថសមត្ថកិច្ចពាក់ព័ន្ធក្នុងស្រុកនេះចាត់ទុកឈ្មួញឈ្មោះ ចែម៉ៅ ជាប្រភពចំណូលរបស់ ពួកគេ។ ហេតុនេះប្រសិនបើលោក ប៊ុន សុធី មេរដ្ឋបាលព្រៃឈើខេត្តកំពង់ធំ មិនជាប់ពាក់ព័ន្ធផលប្រយោជន៍ពីឈ្មួញឈ្មោះ ចែម៉ៅ ទេនោះគួរចាត់វិធានការបង្ក្រាបឈ្មួញម្នាក់នេះជាបន្ទាន់ដើម្បីជាការព្រមានដល់ឈ្មួញដទៃទៀតផងដែរ ។
មន្ត្រីអាជ្ញាធរមូលដ្ឋានក្នុងឃុំចុងដូង ស្រុកបារាយណ៍ ខេត្តកំពង់ធំ បានឲ្យដឹងថា ឈើដែលគេដឹកជញ្ជូនចេញពីដេប៉ូ ចែម៉ៅ គឺយកទៅលក់ចែកចាយតាមបណ្ដាខេត្តមួយចំនួន ជាពិសេសនៅក្នុងខេត្តកំពង់ចាម និងខេត្តត្បូងឃ្មុំ។ ដោយសារតែជំនួញឈើយ៉ាងរលូន របស់ឈ្មួញឈ្មោះ ចែម៉ៅ ទើបបទល្មើសកាប់ឈើ និងដឹកជញ្ជូនឈើខុសច្បាប់ ចេញពីស្រុកសណ្ដាន់ និងស្រុកសន្ទុក នៅតែបន្តកើតឡើងយ៉ាងគគ្រឹកគគ្រេងដដែល ៕
