ភ្នំពេញ ៖ លោកឡាយណារិទ្ធត្រូវបានដកស័ក្តិនិងតួនាទីពីស្នងការរងនគរបាលខេត្តតាកែវឲ្យក្លាយជាមន្ត្រីនគរបាលធម្មតាហើយរងចាំដីកាពីតុលាការ។នេះបើតាមប្រភពពីមន្ត្រីនគរបាលអគ្គស្នងការ។ឯលោកអ៊ូចភាកូនប្រក៏សារលោកស្រីបេនប្រធានក្រុមប្រឹក្សាខេត្តតាកែវក៏ចូលកាន់តំណែងជាអភិបាលខេត្តតាកែវជំនួសលោកឡាយវណ្ណ:ដែរនាថ្ងៃទី៣០មីនានេះ។
ករណីលោកឡាយណារិទ្ធដែលជាបងប្រុសបង្កើតលោកឡាយវណ្ណៈត្រូវបានប្រធាននាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិលោកឧត្តមសេនីយ៍ឯក សុខ ខេមរិន្ទ បញ្ជាក់ប្រាប់កាសែតថា “នៅពេលនេះ ខ្ញុំកំពុងធ្វើការ តាមនីតិវិធី។ មិនទាន់បង្ហាញលម្អិតនៅឡើយទេ ព្រោះរឿងនេះ ប៉ះពាល់កិត្តិយសអ្នកធំច្រើន។ ពេលនេះ យើងកំពុងសាកសួរនៅឡើយទេ”។ ទោះជាយ៉ាងណាប្រភពពីមន្ត្រីនគរបាលបានបង្ហើបថាលោកលោក ឧត្តមសេនីយ៍ឡាយ ណារិទ្ធបានសារភាពទទួលស្គាល់ថាករណីលោកស្រីចេវសុវឌ្ឍនាគឺជាករណីឃាតកម្ម។
លោក ឧត្តមសេនីយ៍ឡាយ ណារិទ្ធ ស្នងការរងនគរបាលខេត្តតាកែវ និងជាបងបង្កើតរបស់លោក ឡាយ វណ្ណៈ អតីតអភិបាលខេត្តតាកែវ ព្រមទាំងនគរបាល ៨នាក់ ត្រូវបានអគ្គស្នងការនគរបាលជាតិ ហៅមកសាកសួរ ដើម្បីបើកការស៊ើបអង្កេតឡើងវិញកាលពីថ្ងៃទី២៧មីនា ពាក់ព័ន្ធការស្លាប់របស់ស្ត្រីមេម៉ាយ ចេវ សុវឌ្ឍនា នៅក្រុងដូនកែវ ខេត្តតាកែវហើយត្រូវបាននគរបាលព្រហ្មទណ្ឌខេត្តតាកែវបិទសំណុំរឿងដោយសន្និដ្ឋានថាជាករណីអត្តឃាត។
សូមរំឭកថា កាលពីយប់ថ្ងៃទី២៦ ខែមករា ឆ្នាំ២០១៨ សពស្ត្រីម្នាក់ ចេវ សុវឌ្ឍនា អាយុ ៣៦ឆ្នាំ រស់នៅភូមិព្រៃជ័យ រាជធានីភ្នំពេញ មុខរបបរសព្វថ្ងៃ ជាសមាជិកនៃក្រុមយុវជន ក១៥៧ និងក៏ជាអ្នកបម្រើការនៅរដ្ឋសភាផងដែរ ត្រូវបានអ្នកបម្រើប្រទះឃើញចងកស្លាប់នៅក្នុងបន្ទប់ដេក នៅក្នុងភូមិគ្រឹះមួយ នាភូមិផ្សារតាកោរ សង្កាត់រកាក្នុង ក្រុងដូនកែវ ខេត្តតាកែវ។នគរបាលខេត្តតាកែវបាននាំគ្នាបិទរឿងនេះតែដោយសារហ្វេសប៊ុកអុកឡុកខ្លាំងវាក៏មានការបញ្ជារឲ្យស៊ើបអង្កេតឡើងវិញពីថ្នាកដេកនាំក្រសួងមហាផ្ទៃកាលពីថ្ងៃទី២៧ ខែកុម្ភៈ ឆ្នាំ២០១៨។
មន្ត្រីនគរបាលនាយកដ្ឋានព្រហ្មទណ្ឌក្រសួងមហាផ្ទៃ ដឹកនាំដោយលោកឧត្តមសេនីយ៍ទោ ប៉ុល រតនា អនុប្រធាននាយកដ្ឋានព្រហ្មទណ្ឌ បានបើកការស៊ើបអង្កេតឡើងវិញ ចំពោះការស្លាប់របស់ស្ត្រីមេម៉ាយរូបស្រស់ម្នាក់នេះ ដើម្បីបកស្រាយចំពោះព័ត៌មានមួយចំនួន ដែលដាក់ការសង្ស័យថា មិនមែនជាករណីធ្វើអត្តឃាតនោះ។
ទាំងព្រលឹងរបស់លោកស្រី ចេវ សុវឌ្ឍនា និងមហាជន សង្ឃឹមថា នឹងទទួលបានយុត្តិធម៌ពិតប្រាកដ ហើយឈានដល់ការចាប់ខ្លួនជនដៃដល់ និងអ្នករួមគំនិត សម្លាប់នាង យកមកផ្តន្ទាទោសតាមច្បាប់ ជាមិនខាន។
ដោយឡែក នៅខេត្តតាកែវ នាល្ងាចថ្ងៃទី៣០មិនានេះដែរ សម្តេចក្រឡាហោម ស ខេង ក៏បានប្រកាសឲ្យលោកអ៊ូចភាចូលកាន់តំណែងជាអភិបាលខេត្តតាកែវផងដែរដោយមានលោកលីសាវ៉េតមនុស្សជំនិតអតីតចៅហ្វាយក្រុងភ្នំពេញលោកកែបជុតិមាផ្ទេរពីអភិបាលរងខេត្តកំពតមកជាអភិបាលរងផងដែរ។
