ភ្នំពេញ ៖ លោកឡាយណារិទ្ធស្នងការរងនគរបាលខេត្តតាកែវនិងមន្ត្រីនគរបាលជំនាញ៨នាក់ផ្សេងទៀតត្រូវបានកោះហៅកាលពីល្ងាចថ្ងៃទី២៨មីនាឆ្នាំ២០១៨មកសាកសួរនៅក្រសួងមហាផ្ទៃពាក់ព័ន្ធនឹងករណីស្លាប់របស់ស្ត្រីមេម៉ាយរូបស្រស់ម្នាក់កាលពីថ្ងៃទី២៦ខែមករា ឆ្នាំ២០១៨កន្លងមកនេះ។លោកនាយឧត្តមសេនីយ៍ គៀត ច័ន្ទថារិទ្ធ អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បានទទួលស្គាល់រឿងកោះហៅនេះក៏ប៉ុន្តែ មិនទាន់បញ្ជាក់លម្អិតពីលទ្ធផលនៃការសាកសួរនេះនៅឡើយទេ។
ប្រភពច្បាស់ការណ៍ បានឲ្យដឹងទៀតថា លោកស្នងការរង និងមន្ត្រីនគរបាលខេត្តតាកែវ ដែលអគ្គស្នងការនគរបាលជាតិ សាកសួរនេះមិនទាន់អនុញ្ញាតឲ្យត្រឡប់ទៅផ្ទះនៅឡើយទេ។
លោកឧត្តមសេនីយ៍ត្រី ឡាយ ណារិទ្ធ គឺជាបងប្រុសបង្កើតរបស់លោក ឡាយ វណ្ណៈ ដែលត្រូវបានដកចេញចេញពីតំណែងអភិបាលខេត្តតាកែវ កាលពីថ្ងៃទី២៦មីនាឆ្នាំ២០១៨។
លោក សួន ផុន ស្នងការរងនគរបាលខេត្តតាកែវ ទទួលផ្នែកព្រហ្មទណ្ឌ ដែលបានកាន់សំណុំរឿងអត្តឃាតចងករបស់ស្ត្រីម្នាក់ នៅខេត្តតាកែវនោះ និងលោក ជីវ ចន្ទដារា ព្រះរាជអាជ្ញាអមសាលាដំបូងខេត្តតាកែវ ដែលបានដឹកនាំស៊ើអង្កេតករណីនេះ បានបដិសេធមិនធ្វើអត្ថាធិប្បាយជុំវិញករណីអគ្គស្នងការកោះហៅស្នងការរងនគរបាលខេត្តតាកែវ មកសួរនេះទេ។
សូមបញ្ជាក់ថា៖ កាលពីយប់ថ្ងៃទី២៦ ខែមករា ឆ្នាំ២០១៨ សពស្ត្រីម្នាក់ ចេវ សុវឌ្ឍនា អាយុ៣៦ឆ្នាំដែលជាមន្ត្រីបំរើការនៅរដ្ឋសភានិងជាសមាជិកយុវជនក១៥៧ដែលមានតួនាទីកសាងកម្លាំងយុវជននៅក្រៅប្រទេស ត្រូវបានអ្នកបម្រើប្រទះឃើញចងកស្លាប់នៅក្នុងបន្ទប់ដេក នៅក្នុងភូមិគ្រឹះមួយ នាភូមិផ្សារតាកោរ សង្កាត់រកាក្នុង ក្រុងដូនកែវ ខេត្តតាកែវ ។
មរណៈភាពអ្នកស្រីចេវ សុវឌ្ឍនា ត្រូវបានសាច់ញាតិ និងមហាជនដាក់សង្ស័យថា មិនមែនជាករណីអត្តឃាតឡើយ ព្រោះស្ថានភាពស្លាប់បង្កប់នូវចំណុចគួរឲ្យសង្ស័យ។ មហាជនជាច្រើន ដាក់ការសង្ស័យ ព្រោះនៅក្បែរសពស្ត្រីរូបនេះ មិនមានកៅអី ដើម្បីឡើងចងក ហើយស្ត្រីនោះក៏បានយកដៃកាន់ខ្សែចងថែមទៀត ហាក់ដូចជាប្រឹងរើបម្រាស់មុននឹងស្លាប់។ ចំណែកនៅលើរបស់សាកសព ក៏មានស្នាមម្រាមដៃផងដែរ។
តែរឿងនេះនគរបាលខេត្តតាកែវបានសន្និដ្ឋានបិទសំណុំរឿងនិងបិទសារពតិមានធំៗដូចជាហ្វ្រេសនីវជាដើមមិនឃើញមានផ្សាយ។នៅក្នុងរបាយការណ៍នគរបាលក្រុងដូនកែវ បានរៀបរាប់ថា នាង ចេវ សុវឌ្ឍនា បានយកខ្សែវាំងននបង្អួច ចងកសម្លាប់ខ្លួន ក្នុងកម្ពស់ពីកម្រាលឥដ្ឋ២៤០សង់ទីម៉ែត្រ, ពីចុងជើង មកកម្រាលឥដ្ឋ២០សង់ទីម៉ែត្រ។
ចំណែកមូលហេតុនាំឲ្យចងកសម្លាប់ខ្លួននេះ ត្រូវបានមន្ត្រីនគរបាលអះអាងថា ជាករណីចងកធ្វើអត្តឃាត ព្រោះវិបត្តិស្នេហា ដោយយោងតាមរយៈសំបុត្រមួយច្បាប់រហែកជា២ចំណែក ដែលគេអះអាងថា រកឃើញនៅក្នុងកាបូបយួរដៃរបស់នាង។តែរឿងសំបុត្រនេះប្រភពខ្លះថាមិនដឹងចេញពីណាទេ?។
