ភ្នំពេញ ៖ លោក សុខ ទូចប្រធានរាជបណ្ឌិត្យសភាកម្ពុជាបានអួតប្រាប់បរទេសថា កម្ពុជាលែងមានពាក្យកាប់ឈើហើយ! ។ ថ្លែងក្នុងឱកាស ចូលរួមបិទទិវាចម្លាក់ឈើពិភពលោក ដោយមានតំណាងអង្គការ សមាគម និងភាគីពាក់ព័ន្ធនានា មកពីបណ្តាប្រទេសជាង១០០ ចូលរួមកាលពីថ្ងៃទី២៨មីនាឆ្នាំ២០១៨នៅខេត្តសៀមរាបលោកបណ្ឌឹតសភាចារ្យសុខទូចបានសរសើរកម្ពុជាថា ជាប្រទេសដែលស្រឡាញ់និងថែរក្សា បរិស្ថាននិងព្រៃឈើ។ ប្រធានរាជបណ្ឌិត្យសភាកម្ពុជារូបនេះ បានបញ្ជាក់យ៉ាងដូច្នេះថា៖«កម្ពុជា មិនមែនជាប្រទេសបំផ្លាញបរិស្ថានទេ។ កម្ពុជា មានឧស្សាហកម្មតូចណាស់ [ខាងព្រៃឈើ] ។ កម្ពុជា ចាត់ទុកវិស័យទេសចរណ៍ ជាឧស្សាហកម្មឥតផ្សែង។ ដូច្នេះ ចាប់ពីពេលនេះតទៅ លែងមានហើយពាក្យថាកាប់ឈើ។ ប៉ុន្តែយើងត្រូវតែអភិរក្ស និងបណ្តុះដើមឈើ»។
លោក សុខ ទូច អះអាងថា បើគ្មានព្រៃឈើនិងធម្មជាតិទេ ក៏គ្មានជម្រកសត្វដែរ ហើយអាចនឹងប៉ះពាល់ជីវិតមនុស្សថែមទៀត។ លោក បន្តថា កម្ពុជា ព្យាយាមបណ្តុះយុវជនជំនាន់ក្រោយ ឲ្យស្រឡាញ់ធម្មជាតិ។
គេមិនដឹងថាតើលោកបណ្ឌឹតសភាចារ្យសុខទូចនិយាយចឹងមានអ្វីជាសំអាងនោះទេ(ឬពាក្យកាប់ខុសពីពាក្យអារឈើ?)ព្រោះប្រសិនបើគេដើរលេងតាមបណ្តខេត្តភូមិភាគឥសាន្តនិងខេត្តភាគពាយ្យព័ប្រទេសគេនិងឃើញឡានធុនយក្សធុនទេសចរណ៍និងម៉ូតូរាប់រយដឹកជញ្ជូនឈើដូចកណ្ឌៀរយកទៅលើក់នៅស្រុកយួន។
សូមបញ្ជាក់ថា ទិវាចម្លាក់ឈើពិភពលោក (World Wood Day) តែងតែប្រារម្ភឡើងជារៀងរាល់ឆ្នាំ ពីប្រទេសមួយទៅប្រទេស។ សម្រាប់ឆ្នាំនេះ កម្ពុជា ធ្វើជាម្ចាស់ផ្ទះ ក្នុងការរៀបចំទិវាចម្លាក់ឈើពិភពលោក ដែលប្រព្រឹត្តនៅក្រុងសៀមរាប ចាប់ពីថ្ងៃទី២១ ដល់ថ្ងៃទី២៥ ខែមីនា ឆ្នាំ២០១៨ ក្រោមប្រធានបទ «ព្រៃឈើ និងជីវិត»៕
