មណ្ឌលគិរី ៖ រថយន្តធុនធំមួយគ្រឿងត្រូវបាននគរបាលប្រឆាំងបទល្មើសសេដ្ឋកិច្ចរបស់ក្រសួងមហាផ្ទៃ ជិត១០នាក់ ដឹកនាំដោយលោក យូ ប៊ុនស្រ៊ាង ប្រដេញតាមចាប់ តាំងពីចំនុចអូរមីស ក្រុងសែនមនោរម្យលើផ្លូវជាតិលេខ៧៦រហូតទឹកដីស្រុកអូររាំង ជិត២០គីឡូម៉ែត្រទើបអាចឃាត់រថយន្តដែលសង្ស័យ ថា លួចផ្ទុកនឹងដឹកជញ្ជូនឈើខុសច្បាប់ ចេញពីស្រុកកោះញែក នោះបាននៅល្ងាចថ្ងៃទី២៧ មិនា ២០១៨ ។
ក្រុមសមត្ថកិច្ចមានរថយន្ត១គ្រឿង តាមកាក់រថយន្តធុនV១មួយគ្រឿង ពណ៏ខៀវ ពាក់ផ្លាកលេខ កំពង់ចាម ៣A ០៣២៥ បិទពីមុខពីក្រោយ តែរថយន្តធំមិនខ្លាចនិងមិនព្រមឈប់ទេ គឺបើកជែងពេញផ្លូវ ស្ទើរតែបុករថយន្តរបស់សមត្ថកិច្ច។
ក្រុមសមត្ថកិច្ចបានយករថយន្តចំនួនពីរគ្រឿងទៅពាំងកណ្តាលផ្លូវទើបអាចចាប់ឃាត់រថយន្តសង្ស័យនោះ ត្រួតពិនិត្យបាន ។ ក្រោយចាប់ឃាត់បានភ្លាមៗមនុស្សពីរនាក់(អ្នកបើកបរ នឹងព្រូ)រួមនឹងរថយន្តត្រូវបានចាប់បញ្ជូនទៅស្នងការដ្ឋាននគរបាលខេត្តមណ្ឌលគិរីដើម្បីត្រួតពិនិត្យ ។ អ្វីដែលគួចាប់អារម្មណ៍គឺថាពេលរថយន្តសង្ស័យកំពុងស្ថិតនៅក្នុងស្នងការដ្ឋាន ស្រាប់តែមានការបង្កើតគណៈកម្មធិការចម្រុះមួយ ឆែកឆេរទាំងយប់ ទោះជាផុតម៉ោងរដ្ឋបាលក៏ដោយតែគេ មិនអនុញ្ញាតឲ្យអ្នកកាសែតចូលយកព័ត៌មានឡើយ ។ រហូតដល់ម៉ោង៨យប់រថយន្តធុនយក្សនោះ ត្រូវគេឃើញបើកចេញពីស្នងការដ្ឋាននគរបាលវិញ យ៉ាងប្រងើយដូចអត់មានរឿងអីចឹង។
ករណីយ៍នេះមន្ត្រីដែលដឹកនាំការចាប់បង្ក្រាបនោះ បាននិយាយថាដោះស្រាយថា មិនមានបន្ទុកសម្រាប់ដាក់លើគេទេ ព្រោះរថយន្តនោះមិនមានដឹកអ្វីឡើយ ក្រៅពី ក្តារបន្ទះកែច្នៃ? ។
ឯលោក ឡោ សុខា ស្នងការនគរបាលខេត្តមណ្ឌលគិរី មិនបានឆ្លើយតបជាមួយអ្នកកាសែតទេ ដោយបានបង្វែរឲ្យសួរទៅលោកម៉ី អាន ស្នងការរងទទួលផែនសេដ្ឋកិច្ច ពាក់ព័ន្ធនិងការដោះលែងឡានទាំងយប់។
លោកម៉ី អាន ប្រាប់ថាក្រោយឆែកឆេរមិនបានរកឃើញមានបទល្មើសព្រៃឈើនៅក្នុងរថយន្តនោះទេ ហើយឃើញតែបន្ទះក្តាកុងផ្លាកេ មូលជាដុំមួយចំនួន ទើបសម្រេចដោះលែងវិញក្រោយពិភាក្សាគ្នាជាមួយលោកព្រះរាជអាជ្ញារងខេត្ត។ឯមន្ត្រីជំនាញ រដ្ឋបាលព្រៃឈើឯណោះវិញ បានឲ្យដឹងថា កាលដែលដោះលែងរថយន្តនោះទាំងយប់ ព្រោះថា រថយន្តនោះដឹកក្តាកុងផ្លាកេ ដែលមានច្បាប់ចេញពីក្រុមហ៊ុនម៉ាស្ទ័រខេសាន់ និងដោយសារតែខ្លាចត្រូវទឹកភ្លៀងក៏សម្រេចដោះលែងទៅវិញតែម្តងទៅ។
មានការកត់សម្គាល់ថានៅពេលដែលសមត្ថកិច្ចចាប់ឃាត់រថយន្តV១នោះភ្លាមៗ អ្នកបើកបរបាននិយាយថា មូលហេតុដែលខ្លួនមិនព្រមឈប់រថយន្តព្រោះមេបញ្ជាថា មិនឲ្យឈប់ទេ ។អ្នកនបើកបរនិយាយថាមេរបស់គាត់មានឈ្មោះ ឧកញ៉ា អុល !!(ដែលគេស្ឡាល់ថាជាមេឈ្មួញមានខ្សែបង្អែកធំប្រចាំភូមិភាគឥសាន្ត)។
លោក សុង ឃាង ប្រធានមន្ទីរកសិកម្មខេត្តមណ្ឌលគិរីបានឲ្យ អ្នកយកព័ត៌មាន សួរទៅរដ្ឋបាលព្រៃឈើបានសេចក្តីថារឿងឈើមួយឡាននេះមន្ត្រីជំនាញឆ្លើយដាក់គ្នាវឹលក្បុង។
មានសេចក្តីរាយការណ៏ មួយបានឲ្យដឹងថា បច្ចុប្បន្នក្រុមហ៊ុនម៉ាស្ទើខេសាន់ដែលពីមុនគេដឹងថាមានឧកញ៉ាសឹងសំអុលជាថៅកែ ត្រូវបានប្តូរឈ្មោះ ទៅជាក្រុមហ៊ុន ប៉ា វី ភី អ វិញហើយដោយមាន អ្នកស្រី ខេន ស្រីមុំ ជានាយកប្រតិបត្តិ ។
សូមបញ្ជាក់ថា៖សព្វថ្ងៃនេះមានសកម្មភាពកាប់ប្រមូលឈើក្នុងដែនជម្រកសត្វព្រៃភ្នំព្រេចដឹកចូលទៅក្នុងដីក្រុមហ៊ុន ដើម្បីបន្លំជាឈើស្របច្បាប់នៅតែមាន។ប្រជាពលរដ្ឋនិយាយថា សព្វថ្ងៃគេឃើញមានគំនរឈើ កំពុងគរទុករាប់រយដុំ នៅក្រោយឃ្លាំងក្រុមហ៊ុនចម្ងាយប្រហែលមួយគីឡូម៉ែត្រ ក្នុងព្រៃរបោះសម្រាប់ ត្រៀមដឹកចេញនៅពេលឆាប់ៗ ព្រោះមានអ្នកកំពុងរត់ការទៅថ្នាក់លើសុំច្បាប់ដឹកជញ្ជូន។ ប៉ុន្តែត្រូវអាក់ខានដោយសារឮថា ទីស្តីការគណៈរដ្ឋមន្ត្រី បានចេញចសេចក្តីសម្រេច បញ្ឈប់គ្រប់ក្រុមហ៊ុនទាំងអស់ មិនឲ្យមានសកម្មភាពដឹកជញ្ជូនឈើចេញបន្តទៀតនោះទេ កាលពីដើមឆ្នាំ២០១៨រហូតដល់ក្រោយបោះឆ្នោត?៕
